Astana Invest қызметкерлері Ресейдің ерекше экономикалық аймағына сапар жасады

Astana Invest қызметкерлері Татарстанда орналасқан «Алабуга» ерекше экономикалық аймағына (ЕЭА) сапар жасады.

Бұл орталық жоғары технологиялық және инновациялық жобаларды жүзеге асыратын инвесторларға қолайлы жағдай жасайды. «Алабуга» ЕЭА 2006 жылдан бері жұмыс істеп келеді және бүгінгі таңда инвесторларға дайын инфрақұрылым ұсынады, оның ішінде өнеркәсіптік, инженерлік, көлік және кедендік нысандар бар.

Сапар барысында Astana Invest қызметкерлері келесі кәсіпорындармен танысты:

• «Алабуга» ЖШС (автокөліктер базасында изотермиялық фургондар, тоңазытқыштар және тауар фургондарын жасауға арналған сэндвич-панельдер өндірісі);
• «П-Д Татнефть-Алабуга Шыныталшық» ЖШС (шыныталшық пен оның негізіндегі өнімдер өндірісі);
• «Алабуга Политех» білім беру орталығы – жылына шамамен 10 мың адам оқытатын білікті жұмысшылар даярлау орталығы;
• «Пирамида» және «Оңтүстік парк» тұрғын үй кешендері – ерекше экономикалық аймақ қызметкерлері мен «Алабуга Политех» студенттеріне білім беру, кеңсе, спорт және тұрғын үй инфрақұрылымын қамтамасыз етуге арналған.

Өзінің жұмыс істеу барысында «Алабуга» ЕЭА үлкен жетістіктерге қол жеткізіп, Ford-Sollers, 3M, Armstrong, Saint-Gobain, Air Liquide, Rockwool және Hayat Group сынды әлемдік ірі компаниялар қатарынан 60-тан астам резидентті тарта алды. Сондай-ақ бұл ерекше экономикалық аймақ халықаралық аренада мәртебесі мен бәсекеге қабілеттілігін растай отырып, әлемдегі ең үздік 40 ерекше экономикалық аймақ қатарына кірді.

«Алабуга» ЕЭА-на сапар ынтымақтастық пен инвестицияларға жаңа мүмкіндіктер ашатын тамаша тәжірибе болды.